Hanne Boel, Henrik Thodesen, Margot og Hans-Wilhelm Steinfeld er nokre av dei mange som skal syte for store opplevingar til publikum i Operahuset Nordfjord komande sesong.
Sesongprogrammet 2016
Tysdag 6. september: Absence Crew
Laurdag 10. september: Margot - Alt i boks
Onsdag 5. - laurdag 15. oktober: Hoffmanns eventyr, Opera Nordfjord
Laurdag 22. oktober: Doug Seegers
Tysdag 25. oktober: Foredrag Berit Nordstrand
Fredag 4. november: Hanne Boel
Tysdag 8. november: Kvinna frå før
Onsdag 9. november: Foredrag Hans-Wilhelm Steinfeld
Fredag 25. - søndag 27. november: You’re a Good man, Charlie Brown - Opera Nordfjord
Fredag 2. desember: O helga natt, Hanne og tre tenorar
Laurdag 3. desember: Min kamp, Karl Ove Knausgård
Fredag 9. og laurdag 10. desember: Lattergalla med Henrik Thodesen mfl
Følgjande arrangement i januar/februar 2017 er også lansert no:
Torsdag 26. januar: Hekla stålstrenga
Måndag 30. januar: Heia Flåklypa!
Fredag 3. og laurdag 4. februar: Klypa presenterer: Kjellen - med prostata mot stjernene
Varierte godbitar
Dans, humor, foredrag, country, teater, soul, opera, musikal, folkrock og mykje meir står på programmet i Operahuset Nordfjord.
– Aldri før har vi hatt ein så sjangermessig variert sesong. Her er det godbitar og store opplevingar for alle, seier operahusleiar og kultursjef Geir Holmen.
Country frå Nashville
Ei veke etter at ovasjonane frå operaen Hoffmanns eventyr 5. - 15. oktober har lagt seg, inntek Doug Seegers scena. Den heimlause singer-songwriteren frå Nashville vart oppdaga av ei svensk countrystjerne, og no er Doug Seegers superstjerne i Sverige. 22. oktober får vi oppleve den sjelfulle musikken hans.
Hanne Boel
Danske Hanne Boel gjorde braksuksess i 1988 med sin soulprega musikk. 15 album og fleire tusen konsertar over heile Europa gjer ho til ein av dei fremste og mestseljande artistane i Skandinavia. Fredag 4. november tek ho med seg bandet sitt til Operahuset Nordfjord. Det blir soul, blues, jazz - gamle låtar i ny drakt og andre låtar Hanne Boel har eit nært forhold til.
Hanne Boel til Operahuset i november
Russiske røvarhistorier
Hans-Wilhelm Steinfeld har blitt servert kaffi av Putin, drukke vodka med Jeltsin, og kjent Gorbatsjov sidan 1975. Onsdag 9. november fortel han om sitt fantastiske liv, i foredraget med tittelen «Russiske røvarhistorier».
Lattergalla
Fredag 9. og laurdag 10. desember kjem tre fantastiske komikarar til Operahuset Nordfjord, for å underhalde publikum med humorshow. Henrik Thodesen, Jonas Kinge Bergland og Dora Thorhallsdottir inviterer til Lattergalla i den aller beste julebordsesongen.
Eksklusivt suksessteater
Karl Ove Knausgård har gjort enorm suksess med romanserien «Min kamp». Historia vart gjenskapt på scena i Sverige i fjor, til jublande kritikkar, ekstraframsyningar og fjernsynsoverføring. Til hausten tek Riksteatret den norske versjonen med seg på turné, og Operahuset Nordfjord er einaste spelestad mellom Os utanfor Bergen og Molde.
Berit Nordstrand
Legen, seksbarnsmora, forfattaren, foredragshaldaren og livsnytaren Berit Nordstrand er landskjend for sine livsstilsråd. «Ta vare på deg sjølv - 12 år yngre på 12 veker» er tittelen på foredraget ho held i operahuset tysdag 25. oktober.
O helga natt
Mange publikummarar har ønskt seg julekonserten med Hanne og tre tenorar tilbake i operahuset. 2. desember får dei ønsket sitt innfridd, fem år etter førre julekonsert her. Hanne Krogh har med seg Thomas Ruud, Kristian Krokslett og Jan Erik Fillan på konserten «O helga natt».
Dans og humor
Absence Crew byr på eit forrykande danseshow tysdag 6. september. Fire dagar etter kjem sjølvaste Margot frå Sunnmøre på besøk, spelt av Ina Breivik. Showet med henne og Øyvind Angeltveit har sett billettrekordar både i Bergen og Ålesund. Ina vart også nominert til Komiprisen for «Margot - Alt i boks».
Musikalsk komedie
Opera Nordfjord set for andre året på rad opp ei familieframsyning i tillegg til operaproduksjonen. 25. - 27. november kan publikum oppleve den musikalske komedien basert på teikneserien Charlie Brown. Lokale barn i distriktet spelar hovudrollene.
Hekla stålstrenga
Tre arrangement etter nyttår er også lagt ut for sal. Publikum kan gle seg til stemningsfull musikk frå nord torsdag 26. januar. Hekla stålstrenga har mange radiohitar, blant anna «Har du fyr». 3. og 4. februar blir det mykje latter når Klypa inntek operahuset med showet «Kjellen - med prostata mot stjernene». Og både barn og vaksne kan gle seg til «Heia Flåklypa!» måndag 30. januar.