IS-kolonne frå Libanon framme i IS-kontrollert område aust i Syria

Ein kolonne med IS-krigarar med familiar som forlét Libanon i august, har fått lov til å køyre inn i eit IS-kontrollert område ved Deir al-Zor aust i Syria.

Det melder eksilgruppa Syrian Observatory for Human Rights (SOHR). Eksilgruppa opplyser at kolonnen kom til provinsen Deir al-Zor onsdag.

Kolonnen med fleire hundre menneske forlét grenseområda mellom Syria og Libanon i slutten av august som ledd i ein våpenkvileavtale med den libanesiske Hizbollah-militsen, som kjempar for Assad-regimet i krigen.

IS-krigarane fekk lov til å evakuere dei tidlegare IS-kontrollerte grenseområda mot at dei sette fri fanga Hizbollah-krigarar og røpa staden der fleire drepne libanesiske soldatar låg gravlagde.

Men den USA-leidde koalisjonen har vore svært kritisk til avtalen. Dermed vart kolonnen ståande fast i ørkenen i Syria som følgje av amerikanske flyangrep som hindra den i å køyre vidare. IS-krigarar som har bevegd seg for langt frå kolonnen, er blitt angripne av amerikanske dronar.

I førre veke opplyste den USA-leidde koalisjonen at dei ville avslutte droneovervakinga av kolonnen og la bussane køyre vidare på oppmoding frå Russland.

Ifølgje SOHR har kolonnen bestått av elleve køyretøy som har frakta 200 IS-krigarar og like mange sivile. Målet for kolonnen har vore den IS-kontrollerte byen Albukamal på grensa til Irak. Byen ligg i provinsen Deir al-Zor.

(©NPK)

Siste nyhende

Demokratar rasar mot omstridt internett-forslag i USA

Demokratiske politikarar i USA er svært kritiske til eit forslag om å fjerne kravet om at nettleverandørar må sørgje for lik tilgang til alle nettstader.

Mnavgagwa tilbake i Zimbabwe

Den avsette visepresidenten i Zimbabwe, Emmerson Mnangagwa, er tilbake i landet. Han skal etter planen ta over makta etter Robert Mugabe.

Putin roser Russland, Tyrkia og Iran for Syria-innsats

På eit minitoppmøte i Sotsji i Russland gir president Vladimir Putin seg sjølv, Tyrkia og Iran æra for å ha hindra ein kollaps i Syria.

EU oppmodar til forsoning etter dommen mot Mladic

Alle leiarar på Balkan må heidre offera ved å arbeide for forsoning, lyder bodskapen frå EU etter at Ratko Mladic vart dømd for folkemord og krigsbrotsverk.

Ratko Mladic dømd til livstid for folkemord i Srebrenica og andre krigsbrotsverk

Tidlegare hærsjef Ratko Mladic er i Haag-domstolen kjend skuldig i folkemord og brotsverk mot menneskja.