Den eldste pandaen i verda er død

Den eldste kjempepandaen i fangenskap er død, 37 år gammal. Det opplyser dyrehagen i Kina der pandaen Basi levde store delar av livet sitt. 
utenriks

Basi var ein elska figur i Kina, og statleg kinesisk TV sende torsdag direkte frå dyrehagen i Fuzhou sør i Kina. Der vart det halde ein minneseremoni for pandaen.

Basi var maskot for dei første Asialeikane, som vart haldne i Kina i 1990. Kjempepandaen hadde levd i dyrehagen sidan ho var fem år gammal, med unntak av seks månader då ho var lånt ut til dyrehagen i San Diego i USA i 1987.

Med sine 37 år, noko som målt i menneskeår svarar til over 100 år, levde Basi nesten dobbelt så lenge som ville kjempepandaer. Ein vill panda lever i gjennomsnitt 20 år, mens pandaer i fangenskap vanlegvis blir eldre.

(©NPK)