Djupvik trekkjer seg som skiskyttarsjef – blir HR-sjef i Start

Morten Aa Djupvik trekkjer seg frå stillinga som idrettssjef i Norges Skiskytterforbund og går til jobben som HR-sjef i fotballklubben Start.

Norges Skiskytterforbund stadfesta tidlegare torsdag at Djupvik går av. Nokre timar seinare vart det klart at Djupvik blir ny HR-sjef i Start.

– Det kjennest veldig bra, sjølv om det er uvant å skulle jobbe med fotball. Da sjansen kom inn frå sida og eg fekk presentert konseptet, skjønte eg at dette var ein sjanse eg ikkje kunne seie nei til. Det blir spennande å vere med og utvikle den største merkevara på Sørlandet, sa Djupvik på ein pressekonferanse i Kristiansand torsdag ettermiddag.

Stor arbeidsbelastning

Djupvik startar i Start ved nyttår og går frå jobben i Norges Skiskytterforbund.

– Det er aldri god timing å forlate eit lag i ein OL-sesong, og eg hadde i utgangspunktet ambisjonar om å halde fram ut sesongen. Men når eg fekk dette tilbodet på den nye heimstaden min, var det umogleg å seie nei. Som firebarnsfar med to små tvillingar er det vanskeleg å vere på topp på både heime- og bortebane til kvar tid, sa Djupvik.

– Eg forlèt eit supert team, som har alle føresetnader for å levere toppresultat denne sesongen. Vi har erfarne trenarar og eit solid støtteapparat, som har jobba godt med å planleggje OL-sesongen, så avgangen min vil ikkje vere kritisk for gjennomføringa av sesongen. Der er jobben alt gjort, legg han til.

Forstår valet

Den 42 år gamle Djupvik vart tilsett som idrettssjef for skiskyttarane i 2014. Da vart han førespegla ei meir administrativ rolle der han skulle følgje opp den sportslege strategien i tillegg i å ha eit kommersielt ansvar.

Arbeidsoppgåvene og belastninga over tid skal ha vorte for stor.

Generalsekretær Rakel Rauntun i Skiskyttarforbundet seier at forbundet respekterer valet til idrettssjefen om å gå av.

– Morten Djupvik har gjort ein strålande jobb for oss, og vi synest det er leitt at han forlèt oss. Vi har likevel stor forståing for valet hans og respekterer ønsket hans om å bu og jobbe på same stad som familien sin. Det sportslege grunnlaget og planane for sesongen er lagt, og vi er i rute til vintersesongen, seier ho.

Overgangsfase

Skiskyttarforbundet opplyser vidare at dei er godt i gang med å finne den beste løysinga for OL-sesongen, slik at arbeidsoppgåvene til Djupvik blir gjennomført på ein solid måte.

– Vi har Morten her ei lita stund til, og han kjem til å vere idrettssjef fram til han startar i ny jobb etter nærare avtale, seier Rauntun.

Djupvik har ei fortid som trenar for herrelandslaget i langrenn, der han var trenar mellom 2006 og 2011. Han har òg vore langrennsekspert i NRK.

(©NPK)

Siste nyhende

Utfortreninga avlyst torsdag òg

Den planlagde gjennomkøyringa av utforløypa i Lake Louise torsdag måtte avlysast. Arrangøren vil spare på traseen til helga.

FIS lèt dei russiske langrennsløparane gå i Ruka

Dei seks russiske langrennsløparane som IOC har stengt ute på livstid, får gå verdscupopninga i Ruka i helga.

Skal undersøkje demens-fare hos fotballspelarar

Ein ny studie skal finne ut om det er ein samanheng mellom headingar og demens for tidlegare fotballspelarar, opplyser det engelske fotballforbundet.

Vipers trekte Issy Paris

Vipers Kristiansand møter Club Lada (Russland), Issy Paris (Frankrike) og København (Danmark) i gruppespelet i EHF-cupen.

Noreg slo Tyskland – klare for semifinale i curling-EM

Thomas Ulsruds lag slo Tyskland i curling-EM torsdag og vart med det klare for semifinale. Ulsrud sikra samtidig OL-billett for sitt lag.