Edvartsen: – Eg legg meg flat og skal endre meg

Svein-Erik Edvartsen er motivert for å komme tilbake som toppdommar neste sesong og vil endre kommunikasjonsform for å vinne tilbake tilliten i dommarmiljøet.

– Eg har ein stor jobb å gjere med å endre kommunikasjonsforma mi slik at ho blir meir etande for alle. Klarheit og ærlegheit må ein tole i ei stor prestasjonsgruppe, men det treng ikkje vere uhøviske eller stygge meldingar som gjer at folk føler seg mobba og trakasserte, sa Edvartsen i eit intervju med TV 2 tysdag.

Han la seg «paddeflat» og beklaga tekstmeldingane som han har sendt til dommarkollegaer, og seier han tar sin store del av ansvaret for den store konflikten som har blussa opp i 2017.

– Det starta med ein fagleg diskusjon, som eg kunne handtert på ein anna måte. Og så eskalerte det dessverre, seier dommaren, som ikkje skal dømme i toppdivisjonane denne sesongen.

Lært mykje

Edvartsen seier han har tatt stor lærdom av det som har skjedd.

– Eg krev veldig mykje av meg sjølv, og eg krev mykje av dei rundt meg. Eg er ingen A4-person. Eg tar stor plass, og eg har ein direkte, ærleg, og kanskje overtydeleg kommunikasjonsform. Eg har aldri meint å trakassere eller mobbe nokon. Eg skal sjølvsagt endre kommunikasjonsform, sa Edvartsen, som var tydeleg på at han tok sin del av ansvaret for det som har skjedd i 2017.

I eit 25 minutt langt intervju med Davy Wathne i TV 2 sa Edvartsen gong på gong at han legg seg flat. Han sa òg at han har stor respekt for dommarsjef Terje Hauge, at han er villig til å skvære opp med han, og at det aldri har vore hans intensjon å bli kvitt Hauge.

Motivasjon

Han avslo å kommentere detaljane i avtalen som vart inngått da toppdommarkontrakten hans for i år vart avslutta. Edvartsen viste til at avtalen er konfidensiell.

– Eg skal gjere mitt for å byggje opp igjen tilliten i dommarmiljøet. Det er ein stor motivasjonsfaktor for meg at det er opna opp for at eg kan komme tilbake i 2018. Og eg skal gjere alt eg kan for å få til det, både i forhold til dommarkollegaer, dommarsjef og dommarkomiteen, sa Edvartsen i intervjuet.

Han sa òg at han kjem til å dømme fotball i 2017 på lågare nivå, men kunne enno ikkje seie på kva nivå.

(©NPK)

Siste nyhende

Søt revansje for Boasson Hagen

Edvald Boasson Hagen (30) tok spurten og vann 3. etappe av sykkelrittet Tour dess Fjords fredag.

Statsministeren til Arctic Race

Statsminister Erna Solberg skal kaste glans over sykkelrittet Arctic Race of Norway i august.

Van Gestel vann opningsetappen i Tour des Fjords

Belgiaren Dries Van Gestel vann 1. etappe av sykkelrittet Tour des Fjords onsdag.

Friidrett: Maraton-NM til Risør

Norges Friidrettsforbund har tildelt noregsmeisterskapen i maraton i år til Risør.

Bendiksen forklarar seg i CAS

Tidlegare landslagslege i langrenn Fredrik Bendiksen skal vitne i Therese Johaugs CAS-høyring i Sveits.