I ein mannsalder har korpsa kome saman til årleg konsert, først i aulaen på Fjordane folkehøgskule, og sidan 2010 i operahuset. I år er det Kjølsdalen musikklag som er arrangør.
Musikantar i alle aldrar
Dei seks korpsa i kommunen har medlemmer frå dei aller yngste aspirantane på åtte-ni år til dei godt vaksne med tiår bak seg i korpsrørsla. Ungt korps er sett saman av aspirantar og juniorar i skulekorpsa, der fleire av dei står på den store scena for aller fyrste gong.
Konkurranseprogram
Det siste året har fleire av korpsa delteke i konkurransar som Sogn og Fjordane-meisterskapen, Nordvesten, NM Brass og NM Janitsjar. Både Kjølsdalen skulemusikk og Eid musikklag stiller med stykke dei nyleg har delteke i konkurransar med.
Solosong og drill
Drill høyrer også med på ein vårkonsert, og drilljentene til Nordfjordeid skulekorps stiller med fire grupper. Kjølsdalen musikklag har invitert med seg sin gode ven Hege Kristin Lillestøl Naustdal og skal saman framføre to nummer som kan appellere til eit breitt publikum. Også Hjelle skulemusikk har songsolistar, frå eigne rekker.
Hyggjeleg stund
Konferansierar på konserten er søskenparet Synnøve (18) og Olav Berstad (16). Begge spelar både i skulemusikken og musikklaget i Kjølsdalen. Arrangøren ynskjer også velkomne til kafeen som opnar ein time før konsertstart, med nysteikte sveler og heimebakst. I pausen vert det blomelotteri.
Deltakarar på Vårkonserten 2017:
Ungt korps
Hjelle skulemusikk
Nordfjordeid skulekorps
Stårheim skulekorps