Ole Schanke Eikum til Innovasjon Norge i Indonesia

Konsernsjef i Sogn og Fjordane Energi, Ole Schanke Eikum. (Foto Almenning .)

Konsernsjef i Sogn og Fjordane Energi, Ole Schanke Eikum, sluttar i stillinga for å byrje i ny jobb som leiar for Innovasjon Noreg i Indonesia. Schanke Eikum vart tilsett som administrerande direktør i Ytre Fjordane Kraftlag (YFK) for 11 år sidan, og vart konsernsjef for Sogn og Fjordane Energi (SFE) etter fusjonen i 2003. Sjølv meiner han det er trist å forlate SFE, samstundes som han gler seg til å ta fatt i nye utfordringar internasjonalt.

– Det blir sjølvsagt trist å forlate så mange dyktige kollegaer og eit konsern som er i vekst og utvikling. Eg har hatt mange flotte år i SFE, men etter 11 år i stillinga var tida moden for å søkje andre utfordringar. Då eg fekk tilbodet om å leie arbeidet med å fremje norsk næringsliv i ein spennande og veksande internasjonal marknad som Indonesia, så var det ei moglegheit eg ikkje kunne takke nei til, seier Schanke Eikum.

Nystarta kontor

Stillinga er nyoppretta i forbindelse med at Innovasjon Noreg til hausten opnar kontor i Jakarta, hovudstaden i Indonesia. Her skal Innovasjon Noreg saman med den norske ambassaden hjelpe norske bedrifter i jakta på kundar og samarbeidspartnarar i landet, med energi som den mest sentrale sektoren.

– Det blir nytt og spennande for heile familien, og heilt sikkert ei stor oppleving både jobbmessig og kulturelt. Med ei folkemengde på 243 millionar er Indonesia verdas fjerde mest folkerike nasjon, og landet kan by på store marknadsmoglegheiter for norsk næringsliv. Det å skulle vere leiar for kontoret i oppstarten blir både ei interessant og utfordrande oppgåve, seier Schanke Eikum.

– Har vore ei sentral drivkraft

Styreleiar Arvid Lillehauge legg vekt på at Schanke Eikum har vore viktig for konsernet sin vekst, men har forståing for at han no ønskjer nye utfordringar.

– Ole har vore ein dyktig konsernsjef og ei sentral drivkraft i oppbygginga av Sogn og Fjordane Energi til eit av dei største energikonserna på Vestlandet. Det er synd at vi mistar han, men samstundes har eg forståing for at han etter 11 år som administrerande direktør i YFK og konsernsjef i SFE søkjer nye utfordringar. Vi ønskjer han masse lukke til i si nye stilling, seier Arvid Lillehauge, styreleiar i Sogn og Fjordane Energi.

Ei attraktiv leiarstilling

Schanke Eikum fråtrer stillinga med verknad frå 1. september, og prosessen med å rekruttere ny konsernsjef vil starte så raskt som mogleg. Lillehauge har god tru på at stillinga som konsernsjef vil trekkje fleire gode kandidatar.

– SFE konsernet tel i dag 250 tilsette, har auka omsetnaden til nærare 1,4 milliardar kroner, og står framfor store investeringar innan både nett og produksjon i åra som kjem. Så det er ingen tvil om at det er ei av dei mest utfordrande og spennande leiarjobbane i fylket som no blir ledig, seier Lillehauge.