– Eit risikoprosjekt

I framlegget om å legge ned fødeavdelinga er det ikkje omsynet til pasientane som står i sentrum, meiner gynekologane Arne Järnbert og Godofredon Santander. (Foto: Anna Wuttudal)

– Eg er sjokkert og uroleg. Det verkar som om det ikkje er pasientane, men økonomien som er i sentrum, seier Godofredon Santander som har vore gynekolog ved Nordfjord sjukehus i ti år.

  Gynekolog Arne Järnbert har i 15 år ført ein utrøytteleg kamp for å oppretthalde fødeavdelinga på Nordfjordeid. Han har redda liv, hindra fødselsskadar og argumentert for viktigheita av å ha ei fødeavdeling i nærleiken.

  Kvinner som skal føde vert vurderte som lågrisiko eller høgrisiko, men den erfarne gynekologen fortel at det ikkje er uvanleg at ein lågrisikofødsel kan bli til ein høgrisikofødsel, og då kan det vere avgjerande å ha mogelegheit for å ta eit hastekeisarsnitt. 

– Heilt utruleg

  – Gong på gong ser eg at lågrisikofødslar blir høgrisikofødslar med bløding og anna elende. Vi som jobbar her vert ikkje spurde om råd. Ingen har spurt om kva eg meiner om å legge ned fødeavdelinga på Nordfjordeid.  At Helse Førde no med eit pennestrøk vil legge ned eit velfungerande fødetilbod med god kvalitet er heilt utruleg. Eg vart ikkje eingong invitert til strategimøtet, fortel Arne Järnbert.

Kommunesamarbeid

I den nye modellen som Helse Førde no tilrår, vert det lagt opp til eit tett samarbeid med kommunane. Järnbert si erfaring er varierande kvalitet på dei vurderingane som vert gjort rundt om i kommunane i forhold til risikofødslar. Han er også skuffa over manglande vilje til satsing i ein del kommunar når det gjeld jordmorstillingar.