Sinne og apati

– Eg trur ikkje dei heilt forstår kva det er dei held på med, seier jordmor Sissel Ommedal (framme). Frå venstre: Barnepleiar Gerd Kroken, barnepleiar Eli Kvalsund, og jordmor Mariann Skjerdal.

Under framlegginga i Førde fredag vart nedlegging av fødeavdelinga tilsynelatande velsigna av helseministaren frå Ap, men blankt avvist av Sp-leiar Liv Signe Navarsete like etterpå.

  Barnepleiar Eli Vengen sit og les utsnitt frå Soria Moria II. Der står det svart på kvitt at ingen lokalsjukehus skal leggjast ned, og at folk skal ha nærleik til akuttenester og fødetilbod.

Trist

Den modellen som styringsgruppa i Helse Førde tilrår og som inneber nedlegging av Nordfjord sjukehus og flytting av fødetilbodet til Førde eller Volda, er stikk i strid med desse klare lovnadene frå regjeringa. 

  – For meg personleg er ikkje dette viktig, eg kan gå av med pensjon når som helst, men eg synest det er trist at dei går inn for eit framlegg som inneber at Nordfjord ikkje lenger skal ha eit sjukehus til innbyggjarane sine. Det er ikkje minst viktig for folk som til dømes får slag og treng svært rask behandling, seier barnepleiar Eli Kvalsund.

Verre enn dyr

– Kvinnene i Nordfjord vert behandla verre enn dyr. Dei tek snart betre vare på dyra enn menneska. For ei ku er det forbod mot transport dei siste vekene før forventa fødsel, medan Helse Førde vil la fødselssjuke kvinner bli transporterte over lange avstandar, seier ei av dei tilsette.   

Synd for kvinnene

– Eg trur ikkje dei forstår kva dei held på med. Når du er frisk og opplagt er det kanskje ikkje så langt å reise, men når du ligg på ei båre med rier er det fælt. Det er ein del damer som føder raskt. Dei vil ikkje rekke å kome seg til Volda eller Førde. Det vil heilt sikkert bli fleire fødslar i ambulanse der du ikkje har dei same hjelpemidla tilgjengeleg. Det er veldig synd for kvinnene i Nordfjord dersom fødeavdelinga ved Nordfjord sjukehus vert lagt ned, seier jordmor Sissel Ommedal.

  Dei som bur i ytre Nordfjord har allereie i dag ti mil på dels smale og krunglete vegar til Nordfjord sjukehus. Til Førde er det ti mil i tillegg pluss ferje. Mellom Nordfjord sjukehus og Volda sjukehus er det 37 kilometer pluss ferje.

Vurderer å flytte

Jordmor Mariann Skjerdal (32) er opphavleg frå Høydal i Volda. Ho har busett seg på Nordfjordeid, men reknar med at flytting kan bli aktuelt om ho mister jobben ved Nordfjord sjukehus. Ho er også i ein alder der barnefødslar er ei aktuelt tema og trur mange av dei som er i den alderen tenkjer på at det gjev tryggleik å bu i nærleiken av ei fødeavdeling. 

  – Du går inn i ei sorg. Eg synest det er trist for arbeidsplassen min, og det er trist for kvinnene i Nordfjord, seier barnepleiar Gerd Kroken.