Må ut om tre dagar

- Det er stressande å alltid vere på flyttefot, seier Hjørdis Erla Jonsdottir. Foto: Magnus K. Aarre

Hjørdis Erla Jonsdottir (47) og hennar to born har vore på bustadjakt i Eid kommune i snart eitt år. 1.juli må familien ut av det siste midlertidige husværet dei har fått leige. Då står dei utan tak over hovudet.

- Eg veit ikkje kva vi skal gjere når vi må ut, vi har ingen alternativ. Eg prøver å la vere å tenkje på det. Eg har prøvd alt mogleg for å finne ein plass vi kan vere, men ingeting er ledig.

Jonsdottir har prøvd å finne bustad sidan ho flytta til kommunen i fjor haust. På søndag må familien på tre ut av den siste av fleire midlertidige bustadar. Då har dei ingen plass å gå.

Ein pressa leigemarknad gjer det vrient for både familiar og einslige å finne hus eller leilegheiter ein kan leige. Ordførar Alfred Bjørlo (V) og leiar i Samfunnsutviklingutvalet, Ole Petter Henden (Sp), oppmodar lokalbefolkninga til å få det som måtte vere av ledige bustadar ut på marknaden.

Valdsam etterspurnad

- Etterspurnaden er valdsam, og vi klarar rett og slett ikkje å skaffe folk plassar å bu, verken kommunale eller private. Det er ein akutt mangel på utleigeleilegheiter - og hus i Eid, seier ordføraren.

Både Bjørlo og Henden vil difor at eidarane skal vurdere om ein har noko som kan stillast til disposisjon.

- Det første ein kan gjere for å få løyst problemet er å gjere tome hus og leilegheiter klare til utleige. Difor ber vi no folk om å sjå seg rundt og vurdere om ein har noko som kan leigast ut, seier dei, og legg til at det også er eit behov for utbygging av bustadar i kommunen.

- Då er eg på gata

Jonsdottir og dei to ungane bur enn så lenge i eit leigd hus i Mogrenda. Jakta på ein ny stad å bu har så langt vore mislukka, trass i at ho har "prøvd alt".

- Eg har kontakta kommunen, NAV, alle eg kjenner, eg har ringt til framande folk med plass ledig, men det er ingenting å finne. Eg forstår det ikkje. Eg ser mange hus står tome, men ingen vil leige ut. Ungane er tøffe, men dei seier dei ikkje orkar å flytte ein gong til. Men kva kan eg gjere?

- Kva gjer du på søndag dersom du ikkje har funne noko?

- Eg veit ikkje. Då er eg på gata.

Les meir om bustadmangelen og Jonsdottir sin situasjon i papirutgåva på torsdag.