Streik i stat og kommune

Vi må ta inn over oss den usikre og ustabile situasjonen som rår i den globale økonomien og særleg i Europa. Dette påverkar også norsk økonomi, norske bedrifter og arbeidsplassar her heime. Det er både overraskande og skuffande at organisasjonane ikkje har tatt dette alvoret inn over seg, seier administrasjonsminister Rigmor Aasrud etter at forhandlingane i statsoppgjeret braut saman natt til torsdag.

Arbeidstakarorganisasjonane har varsla streik for nesten 16.000 tilsette i kommnesektoren frå arbeidstidas start torsdag 24. mai. Fire kommunar og Sogn og Fjordane fylkeskommune blir i første omgang råka av streiken.

I tillegg til Sogn og Fjordane fylkeskommune er tilsette i Førde, Jølster, Lærdal, Stryn og tekne ut i streik.

Frå torsdag morgon er 15 tilsette i Sogn og Fjordane fylkeskommune tekne ut i streik. Desse er organiserte i Fagforbundet. Streikeuttaket omfattar enkelte tilsette i desse delane av fylkeskommunen:

• Mo og Jølster vidaregåande skule

• Stryn vidaregåande skule

• Øyrane vidaregåande skule

• Kulturavdelinga

• Opplæringsavdelinga

Streiken får førebels ingen konsekvensar for elevane ved dei vidaregåande skulane. Sentralbordfunksjonen i Storehagen Atrium i Førde har derimot redusert drift. Alle tilsette her har direkte mobilnummer.

I Lærdal kommune streikar 37 kommunalt tilsette. I denne omgang gjeld dette tilsette i sentraladministrasjonen, kulturkontoret, Lærdalsøyri barnehage, pleie- og omsorg og teknisk drift.

I Førde streikar 28 tilsette. I Jølster er det sju tilsette, fem av dei på kommunehuset, ein på uteseksjonen og ein på Skei skule, tatt ut i streik. I Stryn er det 12 kommunetilsette som streikar.

Skuffa statsråd

– Eg er skuffa og synest det er beklageleg at det ikkje let seg gjere å kome til semje gjennom meklinga. Vi har vist stor vilje til forhandlingar og kome organisasjonane i møte med gode forslag og ei økonomisk ramme som ville sikra alle tilsette i staten ein god vekst i kjøpekrafta.

Det sier administrasjonsminister Rigmor Aasrud i ein kommentar til at det no er streik i det statlege tariffområdet.

Natt til torsdag blei det brot i meklinga i det statlige lønnsoppgjøret. Dei tre hovudsamanslutningane, LO Stat, YS Stat og Unio tek dermed medlemmar ut i streik.

– Basert på dei lønnsoppgjera som til no er gjennomført, er lønnsveksten i år samla rekna til 3 og ¾ prosent i revidert nasjonalbudsjett. Eit oppgjer i denne storleiken ville til dømes for ein kvinneleg førstekonsulent i staten med 16 års ansiennitet bety om lag 20.000 kroner i auka årsløn.

– Krava om ein lønnsvekst over dette var vi ikkje i nærleiken av å kunne akseptere. Vi må ta inn over oss den usikre og ustabile situasjonen som rår i den globale økonomien og særleg i Europa. Dette påverkar også norsk økonomi, norske bedrifter og arbeidsplassar her heime. Det er både overraskande og skuffande at organisasjonane ikkje har tatt dette alvoret inn over seg. Vi er nøydde  til å gjere det. Derfor har vi no kome i den situasjonen vi har, seier administrasjonsminister Rigmor Aasrud.

For Akademikarane er det framleis ikkje avklart om det blir semje.

Krevjande forhandlingar 

- Etter at det blei klart at meklinga i oppgjeret i staten ikkje førte fram, var det dessverre ingen moglegheit for å komme fram til ei løysing i vår sektor. Det beklagar vi sterkt, for vi har opplevd at vi har vore i ein god prosess heile vegen, seier forhandlingsleiar i KS, Per Kristian Sundnes.

- Det har vore krevjande heile vegen, ikkje minst etter kvart som oppgjera i privat sektor er kome i hamn med rammer som ligger langt utanfor det mandat vi har hatt å halde oss til, og det kommunane sin økonomi tillet. Likevel har både forhandlingane og meklinga vore ført på ein god og konstruktiv måte frå alle parter, og KS hadde håp om å kome i mål inntil brotet i statsoppgjeret var eit faktum.

- Vi seier oss lei for at mange innbyggarar ikkje vil få dei tenestene dei har krav på. Når det er sagt, er streik eit lovleg og legitimt verkemiddel frå arbeidstakarorganisasjonane si side. Det viktige no er at alle partar opptrer på ein korrekt måte, og dermed bidreg til at gode samarbeidsforhold raskt kan gjenopprettast etter at konflikten er over, seier Per Kristian Sundnes.