13.000 på Malakoff Rockfestival

–

 I fjor var det eit veldig godt år med til saman kring 10.000 dei to festivaldagane, og vi hadde håpa å gjenta det vi gjorde i fjor. Dette er heilt enormt. Malakoff Rockfestival har blitt ein av Norges aller, aller kulaste rockfestivalar, seier ein strålande fornøgd festivalsjef dagen derpå.

Årets Malakoffarrangement var ein god del større enn fjorårets, med musikk vekselvis på to scener og dermed langt meir krevjande enn tidlegare. Men det har gått på skinner.

  Naustdal er svært godt nøgd både med det musikalske og med gjennomføringa elles. Sjølv om det har vore svært mykje folk, kjenner han ikkje til at det har vore alvorlege hendingar i samband med arrangementet.

– Det er nesten rørande korleis folk har stilt opp for å hjelpe til, seier festivalsjefen som skryter uhemma av lokalbefolkninga sin innsats.

Arrangørane reknar med at kring 550 frivillige, inkludert servering, har hjelpt til, i tillegg til 100-150 på festivalcampen som forballgruppa i Eid IL har hatt ansvaret for.

    Det er all grunn til å vere stolt av innbyggjarane i Eid, og innbyggjarane har all grunn til å vere stolte av Malakoff Rockfestival, seier festivalsjef Arnt-Ivar Naustdal.

Frå politiet vert det meldt om nokre episodar i samband med festivalen.  

Fredag kveld vart ein mann i 20-åra sikta for bruk av narkotika på Nordfjordeid. Mannen erkjente bruk av hasj og amfetamin.

  Seinare om natta vart ein rusa person i 20-åra fjerna frå festivalområdet til Malakoff, etter å ha bråka med vaktene der. Han vert meldt for forholdet.