Vanvittig rockfest

Enslaved sørga for ein vill konsert med headbanging, der trommehinner kunne blitt sprengd om ein ikkje hadde øyrepropper. (Foto: Wibeke Nord Haugland)

Under årets finaste sommardag hittil, kunne festivalfolket nyte vanvittig rockstemning. Festivalfredagen hadde store namn på plakaten, og då The Pink Robots, Enslaved, Thomas Dybdahl, The Cumshots og Big Bang hadde sine opptredenar var det enorm jubel blant publikum.

The Pink Robots var årets lokale Malakoff-band, og for bandet med røter i Selje og Måløy varma det openbart eit rockehjarte å få spele føre eit så entuisastisk publikum. Dei spelte på Amfiscena, og amfiet var praktisk talt fylt til randen av festivalfolk. Bandet passa på å kommentere kor stor pris dei sette på publikumet, og vokalist Hans Christian Helgsen ropte: – Vi elskar Sogn og Fjordane! Utan de hadde vi ikkje vore noko! Spesielt då bandet spelte låta "Curly", den som var A-lista på NRK P3, var lydnivået høgre enn nokon gong, og Helgesen oppmoda publikum om å vere med å synge. ¨

Thomas Dybdahl sørgde for eit vakkert og melankolsk show på scena. Musikken var både eksperimentell, moderne, personleg og utsøkt original, og artisten sjarmerte festivalfolket med si uskyldige framtoning. Ei lita tamburin med auge og bart var den einaste, men perfekte effekten Dybdahl hadde på scena. Då han sang sine mest kjende låtar, som blant anna "Cecilia" og "Love story", sang publikum med av heile sitt hjarte.

Enslaved er blant pionerane i det ekstreme metal-miljøet, og det viste verkeleg igjen på scena. Med langt hår, ville blikk, gitarist i bar overkropp og skinnbukse, og med dødninghovud på scena, var det ei mystisk og skummel stemning blant det mest entusiastiske publikumet. Dei hadde eit forrykande show med fantastisk lydsetting, der dei bokstavleg talt slapp håret laust. Vokalisten brølte ut: - De er det beste festivalpublikumet hittil i sommar!

The Cumshots hadde eit ellevilt show på Amfiscena, der Kristopher Schau framstod like "crazy" som han vanlegvis er. Schau hadde ein enorm energi, og hoppa og spratt rundt om kring over heile scena, heilt våt av svette. Bandet gav alt av seg sjølv, og det var nærast hyllest-tendensar blant publikum. Dei som stod nærast scena såg ut som om dei tilbad artisten, og sang med på alle sangane. Det var openbart noko Schau likte, for det såg ut som om han kjende seg som ein Gud på scena.

Big Bang avslutta kvelden med nok ein suksess-konsert, akkurat som dei gjorde sist gong dei vitja Malakoff Rockfestival. Publikum nærast hoppa og spratt av glede, og på nærast alle songane kunne ein høyre publikum synge med. Rundt om kring stod det forelska festivalkjærastar, og spesielt under songen "Head over heels" blomstra kjærleiken. Vokalisten ropte også ut: – Er det nokon som er forelska her?, og svaret på det var openbart. Bandet framførte den legendariske "Girl in Oslo", og avslutta med det ein perfekt fredagskveld.