– Vi treng fødeavdeling i Nordfjord

Dei to barselkvinnene Stina Holvik (t.v.) og Eva Vikebakk meiner at kvinnene i distriktet bør gjere opprør og ikkje finne seg i at fødeavdelinga ved Nordfjord sjukehus vert lagt ned.

– Eg vil ikkje ha fleire barn dersom eg ikkje får føde på Nordfjordeid, seier Holvik som er frå Måløy og nettopp har fått barn nummer to. Ho har hatt raske fødslar og tykkjer det er rikeleg langt nok å reise til Nordfjord sjukehus.

  – Eg synest det har vore heilt fantastisk å kome hit for å føde. Det er ei heilt anna omsorg her enn det du får på ei større avdeling, seier ho.

45 minutt frå Åheim

– Vanylven kjem ikkje innanfor ein times reiseavstand til Volda sjukehus. Det er kortare veg til Nordfjord sjukehus. Eg bruker berre 40-45 minutt hit frå Åheim og slepp ferje, seier Eva Vikebakk frå Åheim. Ho liker dårleg at det vert jobba for at alt skal til Volda. Det vil bli lengre veg til fødeavdeling også for ein del kvinner på Søre Sunnmøre.

  Dei to barselkvinnene meiner dei fødande fortener å bli tekne godt hand om og sleppe å bli frakta langt av stad, med den risikoen det inneber.

Negativt for folketalet

Holvik og Vikebakk fryktar at nedlegging av fødeavdelinga kan verke negativt på lysta til å flytte heim. Dårlegare tryggleikskjensle på grunn av lang veg til næraste sjukehus og bortfall av dei mange arbeidsplassane ved sjukehuset, vil kunne verke negativt inn på folketalet. Dei stiller seg undrande til at helseministeren tilsynelatande ikkje har innvendingar til at kvinnene i Nordfjord og omegn mister fødetilbodet sitt.

  – Kva veit ho eigentleg om dette? Ho har nettopp vore forsvarsminister og snakka om Pakistan. No skal ho brått vite kva som er best i sjukehussektoren.