Full fotballoperapakke

Det blei endeleg bestemt at ein skulle satse på eit fotballoperaseminar i styremøtet til Eid IL fotball søndag 7. februar. Timinga for å få på plass foredragshaldarane kunne ikkje vore betre.

-          Heldigvis for oss er det EM-kvalifiseringshelg under fotballoperaseminaret. Det gjorde at vi kunne få på plass fotballeiarar på nasjonalt nivå, seier Michael Sjöquist og Rita Nyland i Eid IL fotballgruppa.

Operaen omhandlar som kjent den største kampen i norsk fotballhistorie, der Norge vann 2-1 mot Brasil i VM i 1998, etter scoringar av stryningen Tore André Flo og AaFk-trenar Kjetil Rekdal.

Foredragshaldarane på seminaret som ein kan få med seg før opera og festmiddag, er nok godt kjende for dei fleste.

Ingebrigt Steen Jensen er ein av dei mest etterspurde foredragshaldarane i landet, og har så godt som slutta å ta på seg oppdrag utanfor Oslo-området.

Jan Jönsson er hovudtrenar i eliteserieklubben Stabæk, og var høgaktuell for jobben som landslagssjef både i Norge og Sverige. Han er også ein av dei heitaste kandidatane som ny hovudtrenar i Rosenborg.

Eidaren Harald Aabrekk er no hovudtrenar i Sogndal, og er ein av dei mest profilerte fotballtrenarane i Norge.

Billettane til fotballoperaseminaret blir lagt ut for sal 8. mars, og kan kjøpast på www.eidfotball.no og www.operahuset.no.