Hjelper unge og eldre

Classic UB: Ann-Cecilie Dalseth ligg i senga omkransa av medelevane Siw Therese Leite (f.v.), Lisa Mari Kvalsvik, Ida Sofie Bjørkedal, Camilla Kråkenes, Stine Solheim Husevåg. (Foto: Helga Didrikke Sundal)

Stine Solheim Husevåg, Ida Sofie Bjørkedal, Siw Therese Leite, Lisa Mari Kvalsvik, Ann-Cecilie Dalseth og Camilla Kråkenes går alle på Vg1 Design og handverk ved Eid vidaregåande skule (EVS).

– Vi likar å vere kreative og ville gjere noko anna enn vanleg skule, seier 16-åringane som forklaring på utdanningsvalet sitt.

Venegjeng

Ungdommane kjem frå Nordfjordeid, Hjelle, Deknepollen og Hornindal og ville lage ungdomsbedrift for å hjelpe andre, tene pengar og ha noko å gjere på i fritida. Lærar Haldis Åshamar kom med tipset, slik vart venegjengen til ei bedrift.

Dei har arbeidd med Classic UB sidan november-desember. I slutten av januar heldt dei på å få godkjent alle papira. Slikt må vere i orden før dei kan utføre tenestene dei har planlagt.  

– Vi er eigentleg overraska over at vi ha kome så langt. Vi har jobba godt og effektivt, seier Stine, Ida Sofie, Siw Therese, Lisa Mari, Ann-Cecilie og Camilla.

Mange tenester

Classic UB tilbyr barnepass tredje kvar laurdag i Moengården fram til mai. Der tek ungdommane vare på borna medan foreldra handlar.

Bingo på eldretunet og kanskje sjukeheimen var under planlegging då Fjordabladet snakka med dei i slutten av januar. Leksehjelp for barneskuleelevar kan òg bli ein realitet.

Ungdommane tilbyr å handle, vaske, måke snø og stelle håret for eldre. Barnevakt på kveldstid er også ei teneste frå Classic UB. Ei av bedriftsmedlemmene har seks yngre sysken, så erfaringa er det ikkje noko å seie på.

Nokre av ungdommane i venegjengen har tenkt å bli frisør. Når ein går på Design og handverk, er det fullt mogleg å gå vidare til frisørfaget eller barne- og ungdomsarbeidarfag. Såleis passar ungdomsbedrifta godt inn i skuletida for elevane.

Fjordabladet presenterer alle dei 17 ungdomsbedriftene ved Eid vidaregåande skule fram mot fylkesmessa for Ungt entreprenørskap på Nordfjordeid 11. mars.

Les meir i tysdagsavisa.