Glad for bru-fokus

– Ei ferjeavløysande bru over Nordfjord er svært viktig for utviklinga av regionen vår, seier Eid-ordførar Sonja Edvardsen. Ho forventar at politikarane står ved lovnadene sine om å ikkje starte ein opprivande omkamp om endring av traseen for E39.

– Ei ferjeavløysande bru over Nordfjord vil vere eit stort framsteg for å knyte regionen tettare saman som ein bu- og arbeidsmarknadsregion. Det vil bety ein heilt ny kvardag både for dei mange pendlarane, brukarane av flyplassen på Sandane og dei som i dag må ta ferje for å kome til sjukehuset på Nordfjordeid.

  –  I dag er Lote-Anda det tredje største ferjesambandet i fylket, og med fjerning av bompengane på Fjærland og ferjefri E39-kryssing av Nordfjord vil næringslivet i ytre få eit godt alternativ austover. Det er også eit veldig viktig moment, seier Edvardsen. Ho peikar også på at brua vil vere eit vesentleg bidrag til å knyte Nordfjord tettare til både Sunnfjord og Sogn.

Standardkrav

Sonja Edvardsen er klar over at det i konseptvalutgreiinga vil bli sett på ulike alternativ. Dette er eit standardkrav frå finansdepartementet for prosjekt som kostar meir enn 500 millionar kroner.  Eid-ordføraren har ingenting imot at det vert sett på kvar kryssinga bør skje, men at det må vere eit ferjeavløysande prosjekt er ho ikkje i tvil om. Det er dette som vil gje den mest positive effekten både for regionen og Sogn og Fjordane.

  Bestillinga frå departementet er enno ikkje heilt klar, men det som ligg fast er at ein stamveg ikkje berre skal vere ei kjapp gjennomfartsåre. Vegen skal også tene den regionen den går igjennom.

Politisk semje

Politisk er det ifølgje Edvardsen semje om at dagens vegtrasé for E39 står fast.

  – Vi har eit stortingsvedtak som seier kvar E39 skal gå, og under E39-konferansen i Førde i fjor haust, var det brei politisk semje om at dagens trasé ligg fast, seier Edvardsen. Ho reknar med at dei lovnadene som vart gjevne både i valkampen og seinare er noko ein kan stole på, og at politikarane vil jobbe for ei ferjefri løysing utifrå dette, til beste både for gjennomgangstrafikken og dei folkerike områda som vegen går igjennom.

Bru i 2020

Selskapet for brukryssing i Nordfjord jobbar no for å få bruprosjektet inn i Nasjonal Transportplan for perioden 2014-2023, og Edvardsen ser føre seg at ein er godt i gang med bygging av bru over Nordfjord i 2020. Torsdag 18. februar skal det vere møte på Nordfjordeid der planane så langt skal presenterast. Styreleiar Kjell Opseth skal orientere om arbeidet så langt, samt gå igjennom organiseringa og vegen vidare.