Koseplagg som minne

Chillax UB. F.v. Maria Moen, Kristin Sæterlid, Siri Honningsvåg, Viviann Solheim og Malene Fugle. (Foto: Helga Didrikke Sundal)

Å starte og drive ungdomsbedrift er ein heilt naturleg del av kvardagen for elevane ved Vg2 Sal, service og tryggleik. Kvar fredag er sett av berre til å jobbe med bedriftene, i tillegg til ei stund måndagane og ein del arbeid utanom.

Lærer mykje

Dei fem bedriftseigarane i Chillax UB kjem frå Skei, Stryn, Stadlandet og Sandane. Malene Fugle (17), Maria Moen (17), Siri Honningsvåg (17), Kristin Sæterlid (18) og Viviann Solheim meiner dei lærer mykje av arbeidet i ungdomsbedrifta.

– Det som ser lett ut i bøkene, er slett ikkje det, Og det er mykje meir arbeid og meir krevjande enn vi trudde, seier dei fem ungdommane som skryter av lærar Leiv Johnny Endal.

– Han er så engasjert, støttande og motiverande. Det er utruleg at han greier å ha gnisten heile tida.

Sparkebukse for vaksne

Elevane pønska lenge og hadde mange framlegg til kva ungdomsbedrifter ein skulle ha i klassen. Då dei fekk høyre at EVS ikkje hadde hatt skulegenserar, var planen klar.

Onepiece er eit anna plagg Chillax satsar på. Ei spørjeundersøking viste at elevane ønskte å kjøpe det topp moderne klesplagget som treng nøyare forklaring for oss som er ein del år unna ungdomstida.

– Onepiece er ein heil dress, som ei sparkebukse for vaksne. Det er eit veldig kosete plagg i eit slags joggebukse-aktig stoff. Dressen har hette, og glidelås frå magen til hetta, forklarer elevane.

T-skjorter på messa

Namnet på bedrifta er sett saman av orda chill og relax som betyr å slappe av. Det forklarer godt koseplagga som Chillax satsar på. I tillegg til skulegenserar og onepiece for sal på skulen, planlegg dei å selje spesiallaga t-skjorter under fylkesmessa til Ungt entreprenørskap på Nordfjordeid 11. mars.

Losna endeleg

I midten av januar følte ungdomsbedrifta at dei låg etter skjema.

– Det har vore vanskeleg å få tak i leverandørar, med mykje fram og tilbake, fortel Malene, Maria, Siri, Kristin og Viviann.

Så losna det, no handlar det om å bli samde om logo og trykk før dei tek imot bestillingar frå elevar og tilsette ved skulen.

Fjordabladet presenterer alle dei 17 ungdomsbedriftene ved Eid vidaregåande skule fram mot fylkesmessa for Ungt entreprenørskap på Nordfjordeid 11. mars.