Norgesmeister frå Hjelle

Ole-Mathias Nes stortrivst som tubaist i Manger musikklag og karakteriserer korpset som ein fin og jordnær gjeng. (Foto: Marianne Valeberg Nornes)

Ole-Mathias Nes starta si musikkarriere i Hjelle skulemusikk. No studerer han ved Norges Handelshøyskole og har spelt i norges beste brassband sidan han flytta til Bergen for seks-sju år sidan. Bb-tubaisten har vore nær siger fleire gonger, med andre- og tredjeplassar for både Krohnengen Brass Band og Tertnes Brass.

Skal spele i EM

Som vikar i Manger musikklag fekk han laurdag endeleg oppleve å bli noregsmeister.

– Eg har spelt med dei før, men takka no ja til å vere fast vikar i Manger. Det er kanskje den siste sjansen eg har til å spele på det aller høgste nivået i Norge, før eg flyttar frå Bergen, fortel Ole-Mathias Nes.

Han har halvtanna år igjen av studiane og skal spele med Manger så lenge han bur i byen. Det vil seie at han som regjerande norgesmeister får med seg EM i Montreux 2011 i tillegg til NM der Manger musikklag òg skal halde den gjeve festkonserten.

Klang og musikalitet

NM for brassband samla rekordmange korps frå heile landet i helga. 75 korps med 2.500 musikantar konkurrerte i seks divisjonar. Det var eit høgt nivå med mange tøffe tak i alle divisjonane. Gjevast av alle er sjølvsagt elitedivisjonen. Dei ti brassbanda der starta NM med pliktnummer fredag kveld, laurdag spelte dei sitt sjølvvalde nummer.

Dommarane likte det dei høyrde frå Manger musikklag og gav korpset 95 poeng (av 100) på begge framføringane. Dei trekte særleg fram klangen og musikaliteten til korpset.

Eikanger Bjørsvik musikklag kom på andreplass, berre eit halvt poeng bak Manger, med heile 98 poeng på pliktnummeret og 91 på sjølvvalt.

Grein og lo

Jubelen stod i taket då korpset frå Radøy i Nordhordland endeleg gjekk til topps igjen.

– Det var ville tilstandar, folk både grein og lo, seier Ole-Mathias Nes.

Han fortel om hektisk oppkøyring siste månaden før NM. Då er det to-tre seminarhelger og øving to gonger i veka. Siste veka før konkurransen øver dei kvar dag.

– I tillegg er det mykje heimeøving. Kvar enkelt må gjere ein stor del av jobben sjølv, korpsøvingane blir brukte til å sy det heile saman og tolke musikken, fortel 26-åringen frå Hjelle som har ein draum om å flytte heim på sikt dersom han får seg jobb.

Les meir i tysdagsavisa.

Abonner på Fjordabladet