Total gjennomgang av Helse Førde

– Helse Vest har no ein gjennomgang av drifta i Helse Førde. I denne gjennomgangen skal vi sjå på alle sider av drifta, også korleis administrasjonen skjøttar si oppgåve, seier styreleiar i Helse Vest RHF Oddvar Nilsen, som ber tilsette kome med synspunkt og innspel i prosessen. (Arkivfoto.)

– I den gjennomgangen vi no har sett i gang i høve Helse Førde skal vi snu kvar ein stein. Det gjeld styringssystem, ressursbruk, korleis føretaket totalt sett utnyttar den medisinske kompetansen ein har og ikkje minst økonomi. For helseføretaket i Sogn og Fjordane er det heilt avgjerande at ein får kontroll over økonomien og leverer langt betre resultat enn kva ein har greidd til denne tid, seier Oddvar Nilsen til Fjordabladet.

Konsulent

– Kjem Helse Vest også til å sjå administrasjonen i Helse Førde nærare etter i korta?

  – Eit viktig del av det arbeidet vi starta med det store sjukehusmøtet på Leikanger, der alle kommunane og ordførarane i Sogn og Fjordane var inviterte, var nettopp eit forsøk på å starte ein prosess der, slik at vi kan få innspel som kan dempe dei store motsetningane som er, og har vore i fylket. I tillegg har vi eit konsulentfirma som fortløpande jobbar med situasjonen i Helse Førde. I dette arbeidet vil sjølvsagt også administrasjonen i helseføretaket bli vurdert. Alle steinar skal snuast,  seier styreleiaren i Helse Vest RHF.

Kjøper frå private

– Har ikkje Helse Vest eit forklaringsproblem når dei no inngår avtalar om kjøp av ortopediske tenester frå private samstundes som Helse Førde vurderer å kutte dei ortopediske tenestene ein i dag har ved Nordfjord sjukehus, fordi ein etter seiande har overkapasitet?

  – Først og fremst har vi eit ansvar for å utnytte vår kapasiteten vi har ved sjukehusa i Helse Vest, samtidig som vi ikkje skal svekke pasientane sin rett til å velje. Vi har fritt sjukehusval og det må vi halde oss til. Private sjukehus og spesialistar er elles viktige for å ta ned kø og ventetider, seier Nilsen.

  – Fortonar det seg ikkje ein smule merkeleg også for styreleiaren i Helse Vest at Helse Førde i det hele vurdere å ta bort kikholsortopedien (artroskopisk kirurgi) for skulder og hofte, når  sjukehus er åleine om dette tilbode i Helse Førde, og er tredje eller fjerde størst i landet på nettopp denne avanserte forma for kirurgi? 

  – Eg kan ikkje kommentere dette fordi eg ikkje har nok kjennskap til saker ned på detaljnivå. Det eg kan seie er at det du spør om vil bli tatt med i den totale gjennomgangen av Helse Førde som no rullar og går. For meg er det viktig at det blir malt eit rett bilde av situasjonen og at ein vurderer kva konsekvensar ulike grep fører til. Elles er det viktig for meg å understreke at fokus på pasienten er det som er viktigast i arbeidet framover. Vi har eit overordna sørgje-for-ansvar, seier Nilsen.

Straffar folket

– På det siste styremøtet i Helse Vest avslo styret ein søknad frå Helse Førde om 50 millionar kroner til nytt medisinsk teknisk. I staden vart det løyvd 20. millionar. Er det ikkje urimeleg at folket blir «straffa», fordi helseføretaket har ei udugeleg leiing?

  – Det vil vere ei stor pedagogisk utfordring å forklare at nokon må få budsjetta i balanse, samstundes som vi løyver ekstramidlar til det føretaket i Helse Vest som har det absolutt dårlegaste resultatet. I denne omgang fann vi ikkje rom for meir enn det beløpet vi løyvde, seier Nilsen og gjentek at når det gjeld leiinga sin måte å drifte føretaket så er det ein del av den prosessen som er sett i gang.   

Les meir om kva styreleiar Oddvar Nilsen seier om pasientflukt og prioriteringar i Helse Førde i avisa laurdag. 

Følg med i kva som skjer i Helse Førde - abonner på Fjordabladet