Vestlandsrådet møter Trond Giske

– Den maritime klynga på Vestlandet har kompetanse og tyngde til å kunne verte eit framtidslaboratorium for ei global miljøsatsing til havs, seier fylkesordførar Nils R. Sandal som saman med kollegaene i Møre og Romsdal, Hordaland og Rogaland møtte næringsminister Trond Giske fredag 6. februar, for å drøfte situasjonen for verftsindustrien på Vestlandet. (Arkivfoto.)

Den maritime klynga på Vestlandet har kompetanse og tyngde til å kunne verte eit framtidslaboratorium for ei global miljøsatsing til havs, meinar fylkesordførarane i Møre og Romsdal, Sogn og Fjordane, Hordaland og Rogaland.

Saman med  fylkesordførar Nils R. Sandal frå Sogn og Fjordane møter Karin Halle, leiar for NHO sitt regionkontor.

Motverke svak ordretilgang

Den svake ordretilgangen for verftsnæringa siste året har sett fortgang i tanken om utvikling og introduksjon av ny og meir miljøvenleg teknologi i den maritime næringa. Opprusting av eksisterande fartøy med reinare teknologi, overgang til gassdrivne fartøy og  kondemnering av dei eldste og mest forureinande skipa og fornying av flåten er aktuelle tiltak.

  – Tida er mogen for radikal innovasjon. Det er viktig at styresmaktene, i samarbeid med næringslivet, nyttar sjansen til at vidareføre Norge sin sterke posisjon innan offshore teknologi. Vi har potensiale til å verte leiande på den nye, internasjonale marknaden for maritim miljøteknologi, seier Nils R. Sandal.

Utan nye kontraheringar står næringa framfor eit skrekkscenario med masseoppseiingar , konkursar og forvitring av høgteknologiske kompetansemiljø med høg grad av innovasjon.

Tek Giske på ordet

Verftsnæringa på Vestlandet viser med dette at vi tek statsråden på ordet. Han har tidlegare sagt til NTB at han ønskjer å føre ein offensiv maritim politikk der målet er å etablere Norge som ein verdsleiande maritim nasjon.

– Det vil her vere snakk om ein trippel-vinn-situasjon der vi oppnår ein vesentleg reduksjon av utslepp frå skip, oppretthalden aktivitet i den landbaserte maritime næringa og reduserte kostnadar for rederinæringa, seier Sandal.

Døropnar til fornybar energi

På lengre sikt vil eit nasjonalt program for maritim miljøsatsing kunna fungere som ein døropnar til store, nye marknadar for fornybar energi til havs. Her har norsk teknologi potensiale til å vere internasjonalt leiande.

  – Offshore vindkraft, saman med bølje- og tidevasskraft og marin bioenergi er framtidige vekstområde. I Europa ligg det føre omfattande planar for offshore vindkraftproduksjon i stor skala. For å verkeleggjere planane vil det vere behov for innovasjonar som kan redusere energikostnadane med 30 – 40 prosent. Det er og krav om nye logistikkløysingar, seier Sandal.

– Skal vi kunna drive offensiv teknologiutvikling og ta posisjon i marknaden for fornybar energi, er det avgjerande at staten stiller opp med risikoavlasting og rammevilkår som gjer det mogeleg med kommersiell utvikling, er bodskapen Vestlandsordførarne vil formidle til nærings- og handelsminister Trond Giske, seier fylkesordførar Nils R. Sandal.

Abonner på Fjordabladet